व्हीसीद्वारे साधला विभागीय आयुक्त, जिल्हाधिकारी, पोलिस आयुक्तांशी संवाद
बुलढाणा- सामान्य नागरिकांचे दैनंदिन जीवन सुकर व्हावे अर्थात ईज ऑफ लिव्हिंगसाठी मुख्यमंत्री देवेंद्र फडणवीस यांनी आज राज्यातील सर्व अधिकाऱ्यांना सात कलमी कृती कार्यक्रम निश्चित करुन दिला. मुख्यमंत्री देवेंद्र फडणवीस यांनी आज सर्व विभागीय आयुक्त, जिल्हाधिकारी, महापालिका आयुक्त, पोलीस आयुक्त आणि पोलीस अधीक्षक यांच्याशी दुरदृष्य (व्हीसी) प्रणालीद्वारे संवाद साधला.
मुख्यमंत्री फडणवीस यांनी राज्यातील प्रशासनाला येत्या 100 दिवसांत प्राधान्याने करावयाची कामे याबाबत सूचना दिल्या. या सूचनांवर काय कार्यवाही केली याबाबत १५ एप्रिल २०२५ रोजी आढावा घेतला जाईल, असेही मुख्यमंत्री देवेंद्र फडणवीस यांनी सांगितले. यावेळी उपमुख्यमंत्री एकनाथ शिंदे, उपमुख्यमंत्री अजित पवार यांच्यासह सर्व मंत्री उपस्थित होते. मुख्यमंत्री देवेंद्र फडणवीस यांनी सांगितले की, आपल्या कार्यालयाचे संकेतस्थळ सुसज्ज करा, माहिती अधिकार कायद्यानुसार मागितली जाईल अशी सर्व माहिती अगोदरच संकेतस्थळावर उपलब्ध करून द्या. संकेतस्थळ सायबरदृष्ट्या सुरक्षित करा. शासकीय कार्यालयांची स्वच्छता करा, अनावश्यक कागदपत्रे काढून टाका, खराब आणि वापरात नसलेली वाहने निर्लेखित करावीत. शासकीय कार्यालयात येणाऱ्या नागरिकांसाठी पिण्याचे पाणी, प्रसाधनगृह स्वच्छ राहतील, हे सुनिश्चित करा. अधिकाऱ्यांच्या अचानक भेटी होतील, त्यावेळी ते स्वच्छ दिसले पाहिजे, असे त्यांनी सांगितले.
मुख्यमंत्री देवेंद्र फडणवीस यांच्या सूचना
1-विभाग, कार्यालयाचे वेबसाईट अद्ययावत करा
2-ईज ऑफ लिव्हिंग संकल्पनेवर काम करा
3-शासकीय कार्यालयात स्वच्छता मोहिम राबवा
4-नागरिकांच्या तक्रारी, प्रलंबित प्रकरणे निकाली काढा
5-उद्योजकांना त्रास होणार नाही याची काळजी घ्या
6-शासनाच्या महत्वाच्या प्रकल्प आणि योजनांच्या प्रकल्पांना भेटी द्याव्यात
7-शासकीय कार्यालयात येणाऱ्या नागरिकांना सोयी सुविधा उपलब्ध करून द्या
बुलढाणा जिल्ह्यात प्रभावीपणे राबवला जाईल-जिल्हाधिकारी
मुख्यमंत्री देवेंद्र फडणवीस यांनी जिल्हा प्रशासनासाठी सात कलमी कृती कार्यक्रम निश्चित करुन दिला आहे. त्यानुषंगाने जिल्ह्यातील प्रमुख अधिकाऱ्यांची बैठक घेवून मुख्यमंत्र्यांनी सुचित केलेली कामे प्राधान्याने करण्याच्या सूचना अधिकाऱ्यांना देण्यात आल्या आहेत. हा सात कलमी कार्यक्रम बुलढाणा जिल्ह्यात प्रभावीपणे राबवला जाईल,अशी प्रतिक्रिया जिल्हाधिकारी डॅा.किरण पाटील यांनी दिली.
