बुलढाणा तालुक्यातील पांगरखेड येथील घटना
BNU न्यूज नेटवर्क..
बुलढाणा (6 MAR.2023) सध्या उन्हाळ्याचे दिवस सुरु आहेत. उन्हाळ्यात आगी लागण्याच्या अनेक घटना घडतात. अशीच एक दुदैवी घटना बुलढाणा तालुक्यातील पांगरखेड येथे ५ मार्चच्या रात्री साडेअकरा वाजेच्या दरम्यान घडली. यामध्ये शेतकऱ्याचे पशुधनासह ३ लाखाचे साहित्य आगीत जळून खाक झाले. सुदैवाने शिंदे कुटुंब शेजारी झोपण्यासाठी गेल्याने मोठा अनर्थ टळला.
पांगरखेड येथे रामदास शिंदे यांचे गावात झोपडपट्टी भागात घर व त्याला लागून टिनपत्र्याच्या गोठा आहे. या घराला ५ मार्चच्या रात्री अचानक आग लागली. सुसाट्याचा वारा असल्याने शिंदे कुटुंबीय शेजारी झोपण्यासाठी गेले होते. वारा जोरात सुरु असल्याने सदर घटना रामदास शिंदे यांच्या लक्षात न आल्याने त्यांच्या घरातील संपूर्ण साहित्य तसेच ७० हजार किमतीची १ म्हैस, गाय अंदाजे किंमत ४० हजार, रोख रक्कम ३५ हजार असे एकूण ३ लाखाचे साहित्य जळून खाक झाले आहे. घरातील साहित्य तसेच पशुधन आगीच्या भक्ष्यस्थानी पडल्याने त्यांच्यावर मोठे संकट कोसळले आहे. आज सोमवार ६ मार्च रोजी तलाठी व मंडळ अधिकारी यांनी घटनास्थळी पोहचून पंचनामा केला. शिंदे कुटुंबीयांना शासनस्तरावरुन आर्थिक मदत देण्याची मागणी होत आहे.
